بقلم الإعلامية لارا سليمان نون
من على صفحتها على موقع فايسبوك كتبت الإعلامية المتألقة لارا نون:
بكل هالظلام… فكرتوا بالولاد؟ عملتو برامج للولاد؟ خلقتو شي للولاد؟ انتو عارفين انو ولادنا ما رح يطلعو معافين من هالبشاعة يلي حوالينا؟
بكل هالظلام… ولادنا عم يشهدوا على أسوأ حرب مرت على لبنان… سنة بالبيوت… ما عم بينامو الليل… بين كابوس الانفجار وبيوتنا المكسرة والناس يلي ماتت… وكابوس كورونا يلي ما عم يعرف يخلص… ولادنا “دمار شامل”…
رسالتي موجهة لوسائل الاعلام أولا وللمدارس ثانياً:
بيكفي مشاهد دمار وندب عالتلفزيونات… ولادنا مش زبونات Youtube… ولادنا لازم يحضرو LBC و MTV وتلفزيون لبنان والمنار و NBN من دون اي استثناء… وما معنا مصاري نحط Youtube كل الوقت… وين برامج الاطفال “اللبنانية” يلي بتحاكي واقعن؟… وين برامج الاطفال يلي فيها رقص وفرح واشغال يدوية وصلاة وقصة قبل النوم؟… قرفتونا من التركي والمدبلج والتعتير… قرفتونا من زبوناتكن السياسيين الجاهزين يلتّو كل يوم نفس القرف… ولادنا وين؟؟؟؟؟؟ الطفولة وين؟؟؟؟؟؟؟
أما المدارس ومع كل العواصف يلي عم تواجها… بتمنى من المعلمات والاساتذة Online يبلشو النهار مع الولاد بصلاة… بصورة حلوة عن لبنان… بسؤال عن الأهل… في ولاد أهلن بلا شغل… برّادن فاضي… في ولاد موجوعين عالسكت ومش فهمانين شي… ولادنا مش عسكر… ولادنا عم بيموتو عالبطيء… ولادنا خايفين من كل شي… بتمنى كل يوم تغنو Happy Birthday للولد المصادف عيدو… بنتي بكيت نهار عيدا وتسألني ايمتى رح تخلص كورونا…
أنا كإم اليوم ما بيهمني ولادي يجيبو علامات بقدر ما بيهمني ولادي يطلعو صاغ نفسياً من هالحرب الكونية… بطلب من المدارس من بعد هالتحوّل الكبير ومن بعد ما نرجع عالمدرسة نضيف مادة “حب الذات والثقة بالنفس” ولادي بعدن لليوم بيسألوني ليه قتلونا بالانفجار؟… مادة “الاقتصاد والادارة المالية” من دور الحضانة خلّي الولد يعرف يدير أمورو المادية من هوي وزغير… مادة ال Savoir Vivre والذكاء العاطفي… مادة الاعلام ووسائل التواصل الاجتماعي… ما بقا يفيد نحفظ سنين ما إلا عازة… ما بقا تفيد معركة مرج دابق وكتاب التاريخ المقبّرين عليه… إذا هيدي المرحلة ما عملت ثورة بعالم التربية وبعالم ولادنا… روحوا طمّو حالكن… ما في أمل ببلد “ضاعت طفولتو” بين مخازن النترات ومكنات الأوكسجين وصوَر الأشلاء… وبيروت عم تبكي… يا عالم… ولادنا عم يبكو… في مجال تتحركو؟… في مجال تضووا على معلمة عملت ثورة حلوة بالتعليم Online؟… في مجال تضوو عالولاد بالبيوت بتقاريركن؟… ما تنسوون بليز… إذا نسيتو ولادنا… نساكن الوطن وتخبزو بالأفراح!
