معالي وزير التربية، رح بلش من الآخر مش من الأول… فلتسقط امتحانات البروفيه…

غرّدت الإعلامية “لارا نون ” عبر حسابها على twitter  قائلة :

معاليك، ولادنا صراحة ما عم يناموا… ولادنا من كورونا لانفجار ٤ آب لأزمة اقتصادية لأزمة سوبرماركت وبنزين لزلازل وهزات أرضية…

عندك فكرة معاليك انو في ولاد عمرن ١٢ و ١٣ سنة بلبنان عم ينوصفلن نص حبة xanax من الأطباء هالايام؟ اكيد فيك تسأل وتتأكد… عندك فكرة انو في ولاد كل ليلة بيقولوا لأهلن ما بدنا نموت؟… عندك فكرة عن نسبة الانتحار بلبنان؟..

هيدا عالصعيد النفسي… اما على الصعيد الاكاديمي… امتحان البروفيه ما بيقدّم ولا بيأخر بالحياة الاكاديمية وإلا كانت كل دول العالم اعتمدتو… بعدن ولادنا لليوم بالبروفيه عم يدرسو اتاتورك وجامعة الدول العربية بكتاب تاريخ بعدنا مختلفين عليه… يمكن لو المواد متطورة وعنا بالمنهج مواد متل “الاعلام وتاريخ حديث وsavoir vivre وذكاء اجتماعي واقتصاد ورياضة وفن ورسم” كان بلدنا بألف خير وكنا كلنا شجعنا ولادنا عالامتحان… بس للأسف المنهج معفّن بيشبه كل شي معفن بهالبلد…

معاليك… المدارس الرسمية بعد ما فتحت… بعتقد حضرتك وبأصعب الظروف قادر تعمل نقلة نوعية بهالمنهج… تلغي البروفيه وتبلش تحط مواد متطورة شاء من شاء وابى من ابى…

نحنا اليوم وبصراحة… صرنا اذا بدنا نحط ولادنا ب activités بعد الظهر منحس عم نقصّر تجاه الدرس ومنحس بالذنب ولازم يدرسوا كل تواريخ المعارك والقتل والدم والكذب والدجل بالمواد بالوقت يلّي بالدول المتطورة بتجي الرياضة والموسيقى والفنون قبل كل شي…

معاليك… صرختي صرخة ام عم تعاني… صحيح ما عندي ولد بالبروفيه هلق بس حرصي حرص كل ام موجوعة وحرص كل الامهات يلي عم يتصلوا فيي ويطلبوا نرفع الصوت… امهات ما همن يكون ابنن الأول… همن ابنن يكون بصحة نفسية كاملة… أما لجان الاهل لازم نترك معظمن للطرش والدهان… والتلميع…

معاليك… انت اب وبتمنى تتعاطى مع هالموضوع كأب قبل ما تكون دكتور ووزير…

ما كتير بحب المراسلات الرسمية… من هيك اخترت احكيك من ام لأب… بلغة يومياتنا ووجعنا…. لأنو الوجع صار لغة جامعة بهالايام الصعبة… وإذا ما اجتمعنا بالوجع… بيكون على الدنيا السلام!

Lara Sleiman Noun ✍️