![](https://lebnewsonline.com/wp-content/uploads/2024/05/Picture1-1-1024x576-1-780x470.png)
بتتذكروا ممثلين فاميليا: وين صاروا اليوم؟
مين ما بيتذكر مسلسل فاميليا الشهير لي كتير حبينا وكبرنا علي؟ كان يضحكنا كتير ومن قول يا ريت لو بيعملوا جزء رابع منو! منرجع منشوف نبيلة شقير ورمزي خياط على الشاشة سوا ومنرجع منشوف مغامراتن ومغامرات ولادن.
هالمسلسل تأليف منى طايع وإخراج ميلاد أبي رعد وبلش عرضو لأول مرة بشهر كانون التاني سنة ال2001. وهو مألف من تلات أجزاء، بسبب نجاح أول جزء وتاني جزء وبسبب طلب الجمهور انعمل منو جزء تالت. قصتو بتحكي عن أرملة نبيلة شقير اللي بتلعب دورها رولا حمادة اللي بتحاول تحافظ على مجلتها لتأمين الحياة الكريمة لعيلتها وفجأة بتلتقي برجال مطلق عندو عقدة من الستات بسبب إمو ومرتو السابقة وبتنغرم في. خلونا نشوف وين صاروا أشهر ممثلين مسلسل فاميليا اليوم.
١. جورج شلهوب
لعب دور رمزي خياط وبرع فيه، هو ممثل ومخرج وكمان والد الممثل الشهير يورغو شلهوب وزوج الممثلة القديرة إلسي فرنيني. هو اليوم نقيب الفنانين المحترفين بلبنان وناطرينو بعمل جديد لأن صرح بآخر لقاء إلو مع هشام من أسابيع إنو أول ما يجي عرض ملائم رح ياخدو.
٢. رولا حماده
لعبت دور نبيلة شقير، الصحافية المناضلة لحقوق المرأة. حبت وانغرمت برجل صعب وما بآمن بقدرة وقوة المرا دي هوي رمزي خياط. بلشت مشوارها بأول التمانينات ومثلت بعدة أفلام سينمائية. هاجرت على كندا سنة 1995 ورجعت من بعدها على لبنان لتشارك بمسلسل “العاصفة تهب مرتين”. تجوزت من رجل كندي إسمو شون وإجاها إبن منو سمتو “زمن”. وبعدها لليوم بتجي على لبنان ولتشارك بأعمال فنية ومسلسلات وآخر أعمالها كان مسلسل كريستال لي لعبت في دور “ريحاب”.
٣. ليلى حكيم
الممثلة الراحلة القديرة شاركت بالعديد من الأعمال السينمائية اللبنانية والعربية والمسلسلات متل الغالبون، وأكيد فاميليا بأجزائو كلها بس للأسف توفت سنة 2014.
٤. هند باز
لعبت دور ميرا البنت الغنوجة الرقيقة والحساسة المغرومة بطارق حاف. كانت بداياتها مع مسلسل “طالبين القرب” سنة 1997، ومن بعدها مثلت بعدة مسلسلات ومن أهمها “فاميليا”. ابتعدت عن الساحة الفنية لمدة 9 سنين بعد ما تجوزت وانتقلت على الإمارات وصار عندها ولد إسمو ماركو وبنت إسمها سيلين. بفترة عانت من الإكتئاب بوقت إنقطاعها عن التمثيل بس رجعت تعافت منو. غير هيك، تلقت عدة عروض تمثيل من الممثل جورج خباز لكن بسبب ظروف عائلية ما قدرت ترجع.
٥. نادين الراسي
لعبت دور غادة حبيبة مروان وصديقة ميرا، شاركت نادين بالعديد من المسلسلات متل “ولاد البلد” و”جريمة شغف” وحصلت على جايزة الMurex D’or تلات مرات، بسنة 2007 عن دورها “غنوجة بيا” وبسنة 2008 عن دورها بمسلسل “إبني”، وبسنة 2010 عن كل أعمالها بسنة 2009. تجوزت مرتين، مرة من حاتم حدشيتي ومرة من جيسكار أبي نادر، وهي أخت الفنان الراحل جورج الراسي. آخر أعمالها كان مسلسل “عرابة بيروت” لي عرض قبل كم شهر على منصة “شاهد”. وهي اليوم عم تحضر لعمل جديد مع باسم ياخور وكارلوس عزار “قلب أسود”.
٦. كارلوس عازار
لعب دور صديق غادة وصديق مروان. هو ممثل وفنان ومقدم برامج مشهور، والده الفنان القدير جوزيف عازار. شارك بالعديد من المسلسلات أولها” فاميليا” بدور ثانوي، “باب إدريس”،” وين كنتي”، “غربة”، “لغز الأقوياء”، ومؤخراً “ستيليتو”. وهلق هو بصدد التحضير لعمل جديد “قلب أسود” مع باسم ياخور ونادين الراسي ورح يلعب في دور “وسيم”. بالنسبة لحياتو الشخصية فهوي بحسب ما قولو ما تجوز للهلق لأن تعرض الخيانات كتيرة بحياتو.
٧. باتريسيا داغر
ممثلة لبنانية إشتهرت بالعديد من المسلسلات والسكيتشات الكوميدية وهيي مرتو للمخرج إيلي فغالي. كانت كل الناس تشبها لإيليسا بشكلها. لعبت دور سكرتيرة نبيلة شقير بالمسلسل، وهيي اليوم ناشطة على تيكتوك وخترعت brand لإلها إسمها PaDjama يعني Pyjama مع فوطة منها وفيعا لتهون حياة كل النساء لي عندن كتير أشغال.
٨. يوسف الخال
لعب دور مروان المغرور بالجزء الأول والتالت، نغرمو في كل البنات بوقتها بسبب وسامتو والكاريزما لي عندو ياها. هوي خي ورد الخال وزوج المغنية والممثلة نيكول سابا. فات على عالم الشهرة عن طريق عرض الأزياء وهوي مش بس ممثل، كمان بغني وبلحن وتولى الموسيقى التصويرية لبعض المسلسلات. خاض أيضاً تجربة تقديم البرامج من خلال برنامج “هزي يا نواعم” على الLBC و”لاقونا على الساحة” على الOTV وشارك كمان بالعديد من المسلسلات المشهورة متل “سارة” و”أجيال” و”جذور” و”تشيلو” و”الينابيع” لي غنا مقدمتو وشارك في إختو البطولة. وشارك كمان بمسرحيات شهيرة متل “طائفة 19″لي حققت نجاح كبير وتضمنت 12 غنية بصوتو. حصل على الموركس دور سنة 2014 عن دورو المميز بمسلسل و”أشرقت الشمس” لي كسر الأرض.
الجدير بالذكر إنو يوسف الخال بعد مؤخراً عن الدراما المحلية والمشتركة بسبب خلافات صار إلها سنين مع شركات الإنتاج لي محتكرة
السوق. وآخر أعمالو مسلسل ظل لي لعب في دور قيس وكانت آخر مسرحية إلو “مش بس عالميلاد” للأخوين صباغ.
٩. طوني معلوف
لعب دور “طارق حاف” بالجزء الأول لي عطول بيربط شعرو ، كان مصاحب نهلا سكر وبعدين بحب بنت النية لي هيي ميرا وبينغرم فيها رغم إنو حاول يقاوم هالحب. هوي ممثل ومؤدي أصوات وأبرز مسلسلاتو “فارس الأحلام”، “فاميليا”، “حكاية أمل”، “الشحرورة”، ومن أبرز أفلامو “شربل”، “الأب الحرديني”. شارك كمان بالدوبلاج لل” لؤي في الفضاء” و”فلمور”. شارك مسرحية “حكي رجال” للينا خوري عام 2018.
١٠. وسام صباغ
هوي ممثل ومذيع لبناني اشتهر بأداء عدة شخصيات كوميدية. شارك بالكتير من المسلسلات والأفلام والمسرحيات وتقديم البرامج. أهم أعمالو:” خدني معك” على الOTV، “قصة وقت” على الOTV،” تاكسي أبو شفيق” على الLBC، ومسرحية “نادر مش قادر” ومن أبرز أفلامو “ولعانة”، “أهلاً بكم في لبنان”، “كذبة بيضا”. ومن المسلسلات القديمة لي شارك فيها “طالبين القرب”،” فاميليا”، “مش ظابطة”، “محلولة”،” فادي وراضي”، “ثورة الفلاحين”، و” للموت بأجزائو التلاتة. تجوز زميلتو الإعلامية ميرنا وعندو ولد إسمو جاد لي شارك بالعديد من الأعمال مع بيو.