كتب الدكتور بسّام حنّا رومانوس عبر حسابه على فيسبوك : من قلب لبعا طالع. وتربّيت من صغري ع حبّ هالأرض، حبّ علّموني إياه أهلي، وحفرتو الأيام جوّات قلبي.
مش بس حبيت لبعا، عشقتها، ومن شدّة محبتي تملكت فيها الاراضي، كرمال تضل الأرض لإلنا ولأولادنا من بعدنا.
هدفي الأول حماية أرضنا، تا تضل ملك لإهلها، ونمنع البناء العشوائي تا تضل ضيعة حلوة .
بدي اشتغل ع تحسين كل شي بلبعا: مدارس، حدائق، طرقات، مياه، نظافة، نشاطات للشباب، ورعاية للكبار.
بدي لبعا تكون بلدة المحبة والوئام، بلدة بتلمّ كل ولادها ع قلب واحد.لأنو يللي بيجمعو الله ما بفرقو الإنسان
أنا ما جايي بي وعود كبيرة، جايي اوعد بحبّي وإصراري ع خدمتها وخدمة كل أهلها بدون تفرقة.
بعرف هموم الناس، بعرف حاجات الضيعة، وبعرف إنو بإيدينا نعمل فرق كبير إذا جمعنا المحبة والإرادة.
معكن، وبمحبتكن، بقدر حقق هالحلم.
أنا إبن لبعا، ومتل ما حملت حبها بقلبي، جاهز إحمل همومها على كتافي، وبطلب دعمكم.
بسام حنّا رومانوس، ابن لبعا.
