بلبنان عنا أمتال لكل شي، بتعرفوا إنو عنا أمتال كتيرة عن أشهر السنة؟ ولما يكون الموضوع عن شهر شباط، تأكدو إنو الأمتال أكيد رح تضحكن.
١. شباط لو قد ما شبط ولبط ريحة الصيف في
٢. مشي على غيم كانون ولا تمش على غيم شباط
٣. راح شباط الخباط لا أخد مني عنزة ولا رباط
٤. شباط شبطنا وربطنا وروايح الصيف إجتنا
٥. الزلم متل شباط ما علين رباط
٦. بشباط بيعرق تحت الباط
٧. ليك هيدا أضرب من البسينات بشباط
٨ إجا شباط اللباط
٩. الصيت لشباط والفعل لآدار
١٠. راح العاقل كانون وإجا شباط المجنون
١١. شباط غيمو وهوا أحسن من شمسو وشتا
١٢. شباط أوعالو لا يغرك اعتدالو
١٣. إنت متل غيمة شباط كل ساعة برأي
١٤. مية مرة غيمة شباط ولا مرة صحوة كانون
١٥. شمسة شباط وغيمة آدار من نعايم الله الكتار
١٦. برد شباط بيحمي من الجراد والقحاط
١٧. شمس شباط لكنتي وشمس آدار لإختي وشمس نيسان لبنتي وغيمة كانون لحماتي
١٨. قمح شباط ما بيملي الرباط
١٩. بين شباط وآدار بتفضى الجرار
٢٠. متل شهر شباط كل أربع سنين بزيدو واحد
٢١. سرحنا بشباط على زراعة العنبات
