بعد سنة على انتخاب بلدية الضبية… شو صار؟

بسنة وحدة، وبظل دولة بعدها على حالها، وبظل منع الصرف والتعقيدات الروتينية والبيروقراطية، وبعزّ الأزمات والحروب… فينا نقول إنو في شي تغيّر.

منرجع شوي لورا، لوقت البرنامج الانتخابي… ومنشوف إنو، خطوة خطوة، صار في تنفيذ — مش كامل، أكيد، بس واضح.

✔️ أول شي: النفايات
بعد ما كانت الضبية عم تغرق بالنفايات، شفنا تنظيم ولمّ واضح، لدرجة صرنا نحكي عن مدينة بلا نفايات مقارنة بالسنة الماضية.

✔️ دعم الناس
محاولات جدّية لمساعدة أصحاب الدخل المحدود، وإعفاءات من رسوم جباية الزبالة — خطوة إنسانية بهيك ظرف.

✔️ الإنارة
الضيعة رجعت تنوّر. إنارة شبه كاملة بعد فترة طويلة من العتمة.

✔️ تحسين المعاملات
صار في تسهيل نسبي ببعض الإجراءات — يمكن مش مثالي، بس فرق ملموس.

✔️ بلدية قريبة من الناس
رئيس البلدية موجود، مكتبه مفتوح، والتواصل مباشر — وهيدا شي نادر بهالبلد.

✔️ توافق داخل المجلس
رغم اختلاف الانتماءات السياسية، في انسجام واضح — وهيدا دليل إدارة واعية مش صراع مصالح.

✔️ المبنى البلدي
المبنى البلدي أنجز بشكل كبير، واليوم بسبب الظروف، المعاملات عم تنعمل من خلال مكتب مؤقت، بس هيدا ما بيغيّر إنو المشروع تحقق فعلياً وتقدّم بشكل واضح.

✔️ خطة السير
يمكن في آراء مختلفة حول تقييمها، وهذا طبيعي…
بس الأكيد إنو في محاولة جريئة لمعالجة أزمة السير — وهاد النوع من المبادرات، حتى لو بدها تطوير، قليل ما منشوفه ببلديات تانية.

✔️ الاهتمام بالمرافق والتراث
شفنا اهتمام بـ نهر الكلب وتنظيفه، مع نية واضحة للحفاظ على الآثار والمساحات العامة.

✔️ مشاريع توقّفت… مش فشلت
بعض الأمور تأثّرت بالظروف، بس الإرادة موجودة، والمسار واضح.

✔️ رؤية للبحر
في نية لفتح المجال قدام الناس للاستفادة من البحر، رغم كل الإشاعات اللي طلعت — واللي بتبقى إشاعات لليوم.

⸻

الخلاصة؟
بهالسنة، وبظل كل شي عم ينهار حواليْنا… الضبية مشيت لقدّام.

مش كل شي مثالي،
بس في شغل، في محاولة، وفي اتجاه واضح.

وبهالبلد… هيدا الفرق الحقيقي.

برافو للرئيس والمجلس