بزبدين تزور دارة النائب #هادي_أبو_الحسن للتهنئة بالسلامة وننشر كلمة رئيس بلدية بزبدين الأستاذ بيار البعقليني:
صباح الخير أستاذ هادي،
وصباح الخير للأهل، وللأخوات والإخوة من بلدة بزبدين.
نحن اليوم هون، لأن الأوفياء معك،
ولأن الأوفياء ما بيتركوا رجال الوفا بلحظات الغدر.
نحن هون لنستنكر محاولة الاغتيال الجبانة،
يلي ما استهدفت شخصك بس،
بل استهدفت نهج كامل من العقل والمحبة ورسالة الشراكة.
استهدفوا هادي أبو الحسن،
لأنك كنت وما زلت من أكتر الاشخاص حرصًا على تثبيت الشراكة المسيحية – الدرزية بهالمنطقة،
شراكة قائمة على الاحترام والانفتاح والمحبة،
مش على الفتنة والانقسام.
استهدفوا هادي أبو الحسن،
لأنك رجل إنماء،
ورجل وجدان وضمير،
ورجل الكلمة الصادقة.
استهدفوك لأنك كنت دايمًا بعيد عن الغرائز والتحريض والكراهية،
ولأنك آمنت بلبنان الواحد الموحّد،
استهدفوك لانك عرفت كيف تجمع الناس حواليك بالمحبة والصدق والحضور الوطني والإنساني.
أستاذ هادي،
حتى بلحظة محاولة اغتيالك،
كنت الحريص الأول على لغة العقل،
ورفضت تنجرّ المنطقة للفتنة .
كنت أكبر من الجرح، وأكبر من الاستفزاز،
واليوم كمان عم تدعو للتهدئة،
لأنك بتعرف إنو في ناس بدها تضرب الاستقرار،
وتنفّذ أجندات ما بتشبه أهل هالمنطقة ولا قيمها.
بس يلي ما فهموه،
إنو الرجال الحقيقيين ما بتخوّفهم محاولات الغدر،
وإنو الناس الأوفياء ما بيتركوا حدا وقف حدّن بكل الظروف.
ونحن اليوم هون لنقلك:
الأوفياء معك… وإنت مش وحدك.
أهل بزبدين والمتن الأعلى معك،
وكل صاحب ضمير حرّ معك،
وكل مين بيؤمن بلبنان الرسالة،
وبلبنان المحبة والعيش الواحد، معك.
الله حماك يا أستاذ هادي،
وإن شاء الله تبقى دايمًا صوت العقل، ورمز المحبة،
ورجل الدولة يلي ما بتهزّه محاولات الحقد والغدر.
