كتب الخبير الاقتصادي د. وليد ابو سليمان : استكمال طريق #المتن السريع من بعبدات إلى المتين مش مشروع عادي، هيدا طريق أساسي كان لازم يخلص من زمان. بيوصل بين #الساحل و #الجبل، وبين #بيروت و #زحلة، وبيربط #مرفأ_بيروت بطريق #المصنع. من الناحية الاقتصادية، ما بدها كتير تحليل: أسرع وأرخص للنقل، تجارة أسهل، استثمارات بتصير أوسع، مناطق بتنتعش، ووظائف جديدة بتنخلق. الأكيد إنو أي بلد طبيعي كان خلّص هالمشروع من سنين، بس نحنا للأسف بعدنا عالقين بالمراوغة والمماطلة.
والسؤال الأهم: ليش بعد ما تنفّذ؟ بوقتها، الصندوق الكويتي للتنمية قدّم ٣٥ مليون دولار لتمويل المشروع، وإذا بترجعوا للتقارير، بتشوفوا إنو كل الحجج الإدارية والهندسية كانت انحلت. والأهم من هيك، إن الوصلة الثالثة والأخيرة من طريق المتن السريع أُقرت ورُصد التمويل إلها من أكتر من ست سنين، يعني لا ناقص دراسات ولا ناقص تمويل، فليش بعدو متوقف؟ مين عندو مصلحة إنو هالمشروع يضلّ مجمّد؟ ومين عم يستفيد من إبقاء طرقاتنا الحالية بزحمتها وتكلفتها العالية؟
المطلوب اليوم من نواب المتن الضغط على الجهات المعنية والمطالبة علنًا باستكمال هيدا المشروع، لأنو ما بقى في أي مبرر للتأخير. إذا كان في نيّة فعلية لإعادة إطلاق العجلة الاقتصادية، ما في عذر بعد لعدم استكمال الطريق. #لبنان
